النيابات


النيابــــــــات

امتي بتظهر حركة النيابات ؟؟

الحركة الأساسية شهر نوفمبر من كل عام

الحركة التكميلية في شهر مايو من كل عام

أعرف منين انها ظهرت ؟؟

هاتلاقي إعلان في الجرايد الرسمية

هاتلاقي زمايلك بيقؤلولك إنها ظهرت

تتصل بالوزارة او المديرية وتسأل

التقديم بيكون فين ؟؟
التقديم بيكون في المديريات وممكن برده تقدم في معهد ناصر

ازاي أقدم علي النيابة ؟
دلوقتي الوزارة بتخلي الناس تقدم من خلال النت وأول مرة عملوها في الحركة التكميلية بتاعة 2009 بس يمكن يخلوا بعد كده التقديم من خلال المديريات زي زمان علشان كده هاشرح طريقة التقديم من خلال المديرية عن طريق :
أولا
هاتروح تسحب المظروف من المديرية مجاني
أو ممكن أي حد من زمايلك يجبهولك
بس أوقات فيه مديريات بتغلس وتطلب انه الشخص نفسه هو اللي يجي يسحب المظروف
ثانيا
هاتملئ الرغبات بتاعتك

ثالثا
هاتروح بعد كده تقدم المظروف
لو انت مش فاضي علشان تروح تقدم المظروف ممكن حد قريبك من الدرجة الأولي يقدملك المظروف وهايدوله إيصال ولازم تحتفظ بالإيصال وتعرف رقمه
ولو عاوز تقدم من خلال النت تروح المديرية اللي فيها الجامعة اللي انت متخرج منها وتجيب من عندهم الرقم السري وتروح المديرية في المحافظة اللي انت بتشتغل فيها تجيب رقم الطبيب وتقدر من خلال موقع الحكومة الالكترونية

طيب انت مسافر بره مصر وعاوز تقدم نيابة ينفع ولا لا ؟؟؟
ينفع تخلي أي حد يسحبلك الملف وتخليه يكتب رغباتك
بس بشرط
تخلي حد قريبك من الدرجة الأولي هو اللي يسلملك الملف همابيشترطوا كده في تسليم الملف
امتي بتظهر نتيجة النيابة ؟؟؟
يعني هاتاخدلها شهرين أو أقل أو أكثر بحاجة بسيطة علشان تظهر
هاعرف ازاي انه النيابات ظهرت ؟؟
هاتلاقي زمايلك كلهم متابعين وممكن تتصل بالوزارة أو بالمديرية
طيب التنسيق بتاع النيابة بيكون علي أي أساس ؟؟
بيكون علي أساس الاحتياجات – المجموع – الرغبات
ملحوظة بالنسبة للمجموع بيكون بالمجموع الاعتباري
طيب واحد هايقؤلي أنا خريج الأزهر والدرجات عندنا غير باقي الكليات
انه المجموع بتاعك هايضرب في رقم معين

بحيث في الآخر تتساوي بنفس التقدير بتاع طبيب آخر في أي كلية تانية غير الأزهر
بمعنـــــــــــــــــــــــــي

المجموع الاعتباري = مجموع الطبيب ÷ النهاية العظمي للجامعة ×4600

طيب ازاي بيتم التنسيق بتاع النيابة ؟؟؟

اللي بيحصل يا أخوانا انه ابل حركة النيابة ما يظهر التقديم عليها
الوزارة بتبعت للمديريات وتقؤلها ابعتولنا احتياجاتكم من الدكاترة في التخصصات الطبية المختلفة
هاترد المديرية وهاتبعت للوزارة الأعداد المطلوبة في كل تخصص
بعد كده بيظهر اعلان الحركة ويتم التنسيق
وكل تخصص في كل مديرية بيكون له حد أدني
يعني مثلا
نسا مديرية الصحة بسوهاج كانت واخدة من 75 % معني كده انه أي حد جايب اقل من كده وكتب نسا سوهاج مش هاتيجيلو
فا هايشوفوا الرغبة اللي تحتها لو تناسب مجموع الدكتور هاتبقي هيا دي نيابته لو مش تناسبه ينزله للرغبة اللي تحتها وهكذا ولو ما فيش رغبة ناسبت مجموعه يبقي وقتها هايكون
استنفذ الرغبات
وفي الحالة دي يحق له التقديم علي النيابة في أقرب حركة نيابة تنزل بعد كده
طيب واحد ممكن يسأل أنا ليا كام رغبة ؟؟
24 رغبة في التخصصات الملحة و 48 رغبة في باقي التخصصات

طيب ايه هيا التخصصات الملحة دي ؟؟
هـــي
طب الطوارئ- طب الأسرة- الطب النفسى- الأشعة- التخدير- المعامل- العناية المركزة- العظام- الأطفال المبتسرين- بنك الدم- طب المسنين- جراحة القلب والصدر
بس خلي بالكم كل سنة التخصصات الملحة بتتغير يعني ممكن ما ينزلوش تخصص ملح ويخلوه تخصص مش ملح
طيب ماهي الفترة اللي المفروض اقضيها في التكليف علشان اخد نيابة ؟
أولا : لو هاتقدم في التخصصات الملحة يبقي مش هاتحتاج تقضي أي فترة في التكليف
يعني انت مثلا هاتستلم تكليفك في شهر مارس ولما تظهر حركة النيابة التكميلية في مايو أو الحركة الأساسية في نوفمبر تروح تقدم علي التخصصات الملحة بدون شرط قضاء فترة في التكليف بس خلي بالكم أوقات يشترطوا ست شهور تكليف علشان تعرف تقدم في التخصصات الملحة
ثانيا : لو هاتقدم في باقي النيابات يبقي لازم تقضي فترة سنة في التكليف علشان تقدر تقدم في باقي النيابات زمااااان كان لازم تقضوا سنتين في التكليف وأنا سمعت انهم ها يرجعوا شرط قضاء سنتين تكليف علشان تعرف تقدم في التخصصات الغير ملحة

نصيحتـــــــــــــــــــــي
ما تستعجلشي
لو كنت بتحب تخصص معين في التخصصات الملحة يبقي خلاص قدم فيه
لو مش بتحبه يبقي استني سنة في التكليف علشان تاخد االتخصص اللي بتحبه واللي تقدر تبدع فيه

طيب ظهرت نتيجة النيابة

امتي وازاي استلم النيابة ؟؟

امتي ؟
لما بتظهر نتيجة النيابة بتسأل في المديرية بتاعتك النيابة وصلت من الوزارة ولا لسه لانها بتكون ظهرت علي النت ابل ما تروح المديريات
لو راحت المديرية هاتستلم النيابة بعد ست شهور من ظهورها وده قرار جديد السنة اللي فاتت كان الاستلام بيكون بمجرد وصول نتيجة الحركة للمديرية
ازاي؟؟
تروح لمدير الرعاية الأساسية اللي في المديرية وتقؤله عاوز استلم النيابة هايقؤلك اكتب طلب لوكيل الوزارة وهايبص علي اسمك وهايكتبلك في الطلب السيد وكيل الوزارة حيث أن المذكور مرشح لنيابة كذا
هاتروح لوكيل الوزارة هايوافق وهايكتب شئون العاملين لإخلاء طرفه من الوحدة لتنفيذ النيابة في مستشفي كذا وهايوزعك أو ممكن مدير الطب العلاجي في المديرية يوزعك علي مستشفي معينة في المحافظة دا لو هما مش عاوزينك في التكليف لكن لو حاجة العمل تتطلب انك تفضل في التكليف فترة فا من سلطة وكيل الوزارة أنه يأخر استلامك للنيابة
هاتروح شئون العاملين هايدوك خطاب إلي الإدارة بتاعتك علشان تخلي من الوحدة بتاعتك هاتروح الإدارة هايدوك جواب إلي الوحدة لاخلااء الطرف هاتروح الوحدة هاتخلي وهاترجع الإدارة تخلي وهاتروح المديرية تخلي
يبقي انت كده أخليت من القطاع الوقائي مبروك وداعا للتكليف
وهاتروح بئه للموظف المسئول عن تنفيذ النيابة وهاتستلم النيابة في المديرية وهاتاخد منه جواب موجه للإدارة بتاعتك علشان تستلم النيابة وبعد كده هاتروح للإدارة اللي هاتديك جواب موجه إلي المستشفي اللي اتوزعت فيها
أما لو انت جاتلك مستشفي تعليمي أو مستشفي تأمين صحي أو أي هيئه أخري المديرية هاتديك خطاب موجه مباشرة إلي هذه الهيئة

طيب ممكن ألغي النيابة بتاعتي وأرجع الريف تاني ؟؟؟
اه ممكن تلغيها بس برده هاتتحرم من التقديم حركتين متتاليتين

طيب هل أقدر أغير النيابة بتاعتي ؟؟؟
تقدر تغير النيابة بتاعتك بشرط انه النيابة الجديدة اللي انت عاوزها يكون الحد الادني بتاعها مناسب لمجموعك
وأوقات يشترطوا انك تكون كاتبها في الرغبات بتاعتك
مثال
أطفال مديرية الصحة بالقاهرة مثلا اخدت من 80 %
وانت جاتلك نيابة جراحة
وعاوز تغيرها لأطفال تقدر تغيرها بس بشرط تكون جايب علي الأقل مجموع الأطفال اللي هيا 80 %

طيب هل أقدر أسافر أو اخد إجازة بدون مرتب واسيب النيابة وبعد كده ارجع ابقي أكملها ؟؟
ابل الإجازة بدون مرتب لازم تستلم النيابة الأول وبعد كده تاخد الإجازة بدون مرتب سؤاء للسفر أو لأي سبب آخر
والمفروض الإجازة دي لا تزيد عن سنتين لأنه مشمسموح ليك انك تبعد عن النيابة أكتر من سنتين لو غبت عن النيابة أكتر من سنتينهاتتلغي النيابة بتاعتك وهاتتحرم حركتين متتاليتين

طيب تعمل ايه لو جاتلك النيابة بتاعتك غلط ؟؟؟
تقدم تظلم لأنه بيفتح باب التظلمات بعد ظهور النتيجة لمدة 15 يوم في المديريات و في معهد ناصر
وبعدها بشهر أو اتنين تظهر نتيجة التظلم وتاخد حقك انشاء الله ولازم تكون محتفظ بالإيصال اللي اخدته زمان لما سلمت المظروف
وبرده لما هاتقدم علي التظلم هايدوك إيصال احتفظ بيه

كيف تحسب فترة النيابة ؟؟؟
تحسب من أول يوم استلمت فيه النيابة ولو اخدت إجازة أثناء النيابة لا تحسب هذه الإجازة من فترة النيابة

هيا النيابة كام سنة ؟؟؟
النيابة أربع سنتين عمل فعلي خلالها لازم تاخد درجة علمية أعلي من البكالوريوس سؤاء دبلوم أو ماجستير
بعد الأربع سنين بتبقي طبيب مقيم مؤهل لمدة سنة بعد كده تبقي مساعد أخصائي
طيب افتراضا ما ماقدرتش اخد أي درجة علمية خلال الأربع سنين ايه اللي يحصل ؟؟؟
هايدوك فرصة تانية لمدة تلات سنين لو ماقدرتش تاخد فيهم درجة علمية تحول للشغل الإداري
طيب افتراضا جاتلي نيابة تعليمي أو نيابة تأمين صحي هل معني كده اني هاقعد طول عمري في المستشفي التعليمي دي أو مستشفي التأمين الصحي دي ؟؟
لا النيابة في المسشتفيات دي أو أي هيئة غير مديريات الصحة بتكون فترة مؤقتة ( انتداب ) أربع سنين وبعد ما يخلصوا الأربع سنين وتكون اخدت دبلوم أو ماستر ترجع المديرية اللي انت تابع ليها أصلا
إلا إذا
نزلتلك درجة مالية في التعليمي أو التأمين الصحي أو المراكز الطبية المتخصصة واتعينت في المستشفيات دي وده بيحصل في حالة وجود كوسة قوية جدا جدا أو لو كان حظك كويس أوي بدون واسطة

أنا استلمت النيابة بتاعتي وبعدها روحت الجيش هل يعتبر الفترة اللي هاقضيها في الجيش محسوبة من فترة النيابة بتاعتي ؟؟؟
أيوه محسوبة وتقدر تسجل وانت في الجيش وتقدر تمتحن كمان
طيب لو جاتلي نيابة وما استلمتهاش وروحت الجيش ؟؟
أولا النيابة هاتروح عليك

ثانيا لا تحسب فترة الجيش دي من فترة النيابة لأنك علي قوة التكليف مش النيابة لأنك ما استلمتش النيابة

طيب أقدر أغير مكان النيابة بتاعتي يعني انقل من محافظة للتانية ؟؟
ممكن في بداية النيابة بالكوسة أما قانونيا بعد مضي سنتين عمل فعلي في النيابة إلي في المحافظة اللي رشحت فيها في البداية بشرط موافقة الجهتين وهما بيراعوا الحالات الأسرية بالنسبة للفيمال وكمان بيراعوا الحالات الطبية الخاصة

طيب لو مر عليا خمس سنين وما قدمتش علي نيابة أقدر أقدم بعدها علي نيابة ؟؟؟
لا ليس لك الحق في التقديم علي نيابة بعد مرور خمس سنين في التكليف عمل فعلي يعني لو واخد اجازة بدون مرتب مش هاتتحسب من السنين الخمس سنين
ولو عديت الخمس سنين عمل فعلي
تقدر تقدم علي نيابة الريف

طيب ايه هيا نيابة الريف دي ؟؟
دي معناها انك تقدم علي نيابة وانت شغال في الريف يعني تقعد طول عمرك تشتغل في القطاع الوقائي وماتشتغلشي في المستشفيات إلا إذا كنت عامل انتداب للمستشفي
والحركة بتاعة نيابات الريف دي بتنزل كل سنة غالبا في شهر أبريل
وبتاخد سنة تدريب في المستشفي وبتحضر خلال النيابة دي دبلوم أو ماستر
يعني من الأخر هاتبقي أخصائي بس شغلك هايكون في القطاع الوقائي اللي هو الريف أو أي شغل وقائي إلا إذا عملت انتداب إلي مستشفي

كام دخل النايب المادي أثناء فترة النيابة ؟؟
أولا : المرتب

ثانيا : حافز الطبيب 300 %

ثالثا : 45 جنيه عن كل نبتشية بحد أقصي عدد 12 نبتشية في الشهر

رابعا : نسبة من فلوس الصندوق بتاع المستشفي

خامسا : نسبة من الاقتصادي لو المستشفي مطبقة الاقتصادي

طيب إيه هيا الأماكن اللي أقدر أقدم نيابة فيها ؟؟؟
أولا : مديريات الصحة

ثانيا : هيئة التأمين الصحي

ثالثا : المستشفيات التعليمية

رابعا : المؤسسة العلاجية

خامسا :الأمانة العامة للصحة النفسي

سادسا :المراكز الطبية المتخصصة

سابعا : المراكز الإقليمية لبنوك الدم

ثامنا : التجميل والحروق
تاسعا : طب المسنين
عاشرا : الحجرالصحى

طيب إيه هيا مميزات وعيوب أماكن النيابات ؟

أولا

مديريات الصحــــــــــة

المميــــــــــزات

-1 القبول بيكون من مجموع قليل مش زي التعليمي ولا أي مكان تاني

يعني أصحاب المجاميع العادية ممكن يلاقوا التخصص الليبيحبوا يتخصصوا في مديريات الصحة والمديريات هي المكان الأكثر قبولا للنواب عليمستوي باقي هيئات وزارة الصحة وبيقبل أعداد كبيرة

-2 فيه مديريات فيها مستشفيات كويسة وفيها تعليم كويس زي مثلا مستشفي أم المصريينبالجيزة لكن فيه مديريات كتير فيها مفيهاش أي نوع من أنواع التعليم خصوصا في بعض التخصصات
-3 يعني ممكن تاخد راحتك في الشغل شويه خصوصا في الجراحاتيعني تقدر وأنت من أول سنة نيابة تعمل عمليات كتير بايدك بس المهم تلاقي حد يعلمككويس

-4 حافز الطبيب ال 300 % بيصرف لنواب مديريات الصحة ومشموجود في أماكن تانية

-5 لو اتشهرت في المستشفي اللي بتشتغل فيها ده هايساعدك لماتفتح عيادة في نفس المدينة أو المنطقة اللي فيها المستشفي

العيـــــــــــوب

-1 بسهولة جدا ممكن تاخد النيابة من أولها لاخرها من غير ماتتعلم شئ يعني قصة التعليم في مديريات الصحة بصراحة مش مضمونةإطلاقا

-2 ماديا مش حلوة أوي يعني فيه جهات بتدي فلوس أكتر منها زيهيئة التأمين الصحي بتاخد فيها حوافز زيادة خاصة بالتأمين
3- ممكن تتوزع علي مستشفي بعيدة عن محل إقامتك لأنه التوزيع بيكون علي من خلال تنسيق علي مستوي الجمهورية

ثانيا

هيئة التأمين الصحي
ومنها

مستشفي مدينة نصر – مستشفي صيدناوي – مستشفي المقطم – مستشفي

6 أكتوبر – مستشفي الفيوم – مستشفي النيل – مستشفي جمال عبدالناصر

مستشفي كرموز – مستشفي الطلبة سبورتنج – مستشفي الهلال سوهاج

المميـــــــــزات

-1 ممكن في بعض المستشفيات التابعة للتأمين مش كلها يكون فيه تعليم وبعض المستشفيات بيكون مشرف عليها أساتذة من الجامعة

-2 ماديا إلي حد ما كويس لأنه فيها حوافز أكتر من مديريات الصحة

والفترة اللي جاية هايكون للتأمين الصحي مستقبل وفلوس كتير خصوصا بعد ما يفصلوا الخدمة عن التمويل وذلك بإنشاء صندوق خاص يتولي إدارة التأمين الصحي لأنه معايير الجودة بتتطبق دلوقتي في مستشفيات كتير من مستشفيات التأمين يعني مستقبلا التأمين هايكون له وضع مميز
-3 بيقبل من مجموع متوسط يعني مش صعب انك تلاقي فهي نيابة حلوة يعني الحد الأدنى بتاع التخصصات مش كبير

العيــــــــــــــوب
1- ممكن ماتلاقيش تعليم كويس في مستشفيات كتير

-2 ممكن ماتاخدشي راحتك في الشغل بايدك في الجراحات

ثالثا

المستشفيات والمعاهد التعليمية
وتشمل علي
مستشفي أحمد ماهر التعليمي – مستشفي المطرية التعليمي – مستشفي الجلاء التعليمي – مستشفي الساحل التعليمي – مستشفي سوهاج التعليمي – مستشفي أسوان التعليمي – مستشفي شبين الكوم التعليمي – مستشفي بنها التعليمي – مستشفي دمنهور التعليمي

معهد جراحة القلب والصدر – معهد السكر – معهد التغذية – معهد شلل الأطفال – معهد بحوث الحشرات – معهد السمع والكلام – معهد الرمد التذكاري – معهد الأبحاث لطب المناطق الحارة – المعهد القومي للكلي والمسالك البولية

المميــــــــزات
-1 دي أحسن جهة بعد الجامعة ممكن تلاقي فيها تعليم كويس وتطلع منهانايب محترم علميا لأنه اللي حواليك كلهم بيكونوا واخديندكتوراة او زمالة أجنبية وكمان أوقاتكتير تلاقي أساتذة جامعة بيتشغلوا فيها ويمكن كمان تلاقي في بعض الهيئات فيها تعليمأحسن من الجامعة
-2 لو معاك واسطة أو بالنصيب ممكن ينزلك درجة مالية وتثبت عندهم وتحضردكتوراه

العيــــــــــوب

1- فيه مستشفيات فيها مش كويسة إلي حد ما بساغلبها كويس وأهم حاجة انك تدخل الهيئة بعد كده الانتداب من مستشفي للتانية سهل مادام دخلت الهيئةالتعليمية
2- المستشفيات والمعاهد التعيلمية بتقبل من مجموع عالي يعني فيهنيابات فيها بتاخد من مجموع زي نيابات الجامعة
-3 ماديا زيها زي وزارة الصحة لأنك بتاخد مرتبك من وزارة الصحة لانك انتداب

رابعا

المؤسسة العلاجية

أشهر مستشفي فيها هيا مستشفي هيليوبلس

المميــــــــــزات

1 – يعني ممكن تلاقي فيها تعليم لأنه بشتغل فيها أساتذة جامعة وكمان استشاريين من الجيش

2- ماديا كويسة لانك بتاخد فيها بدلات كتير زي بدل طبيعة العمل و بدل العدوي و نسبة من قيمة حصيلة رسم الخدمة شهريا و الحوافز المقررة مقابل النوبتجيات

العيـــــــــــــــوب


1- في الجراحات ممكن ما تتعلمشي كويس لأنه معظم الشغل فيها بفلوس والمريض بيدفع كتير فا مش هاتاخد راحتك في الشغل
2-فيه مستشفيات فيها مش كويسة عاوزة واسطة علشان تقدر تلتحق بمستشفي نضيفة

سادسا
المراكزالطبية المتخصصة

وتشمل


أ‌-متعددة التخصصات وتشمل:

معهد ناصر – الهرم – الهلال – العجوزة – السلام – دار الشفاء – الشيخ

زايد – شرق المدينة – القباري – المواساة – المنصورة الدولي – الأقصر

الدولي – أبوسمبل الدولي – شرم الشيخ الدولي

ب‌-أحادية التخصصات وتشمل :

المركز القومي للرمد بروض الفرج – مركز الرمد الأزهر – مركز الصدر والحساسية بإمبابة – مركز تأهيل وعلاج المسنين بحلوان – المركز القومي

لخدمات نقل الدم– مركز الإسعاف الطائر – مستشفي الأطفال التخصصي ببنها – مركز القلب بالمحلة – مركز القلب والكبد بكفر الشيخ – مركز كفر الدوار

ج – جراحات اليوم الواحد وتشمل :

بمدينة نصر – البساتين – المرج – روض الفرج – الزاوية الحمراء – التبين – راس البر – وادي النطرون – سمالوط – قنا – مرسي علم – كفر الزيات – اشمون

د- مراكز الأورام وتشمل :

أورام السلام – أورام معهد ناصر – أورام طنطا – أورام البحيرة – أورام دمياط – أورام المنيا – أورام سوهاج – أورام أسوان

المميــــــــــزات

1- تعليم كويس أوي في معظم المستشفيات التابعة ليها وفيها استاف جامعةكتتتتتتتير واستشاريين كتير أقل واحد معاه دكتوراه

2- ممكن من خلالها تتعرف علي شخصيات ليهاوضعها وممكن من خلالها تشتغل مع استاف بره
3- فيه مستشفيات فيها التردد بتاعها قليل وده مش بيديك فرصة انك تشتغل كتير
العيـــــــــــــوب
1- ممكن برده ماتاخدشي راحتك أوي في شغل الجراحات
2- عاوزة واسطة في الغالب علشان تروح مكان نضيف

سابعا

الوقـــــــــــائي

بمعني انك تاخد نيابتك في الهيئات الآتية

1 – الإدارة المركزية للشئون الوقائية ودي تحتوي علي الآتي :

** مكافحة الأمراض المعدية :

المميزات
· إمكانية التسجيل المبكر للدراسات العليا.
· الاشتراك فى الدورات التدريبية المتخصصة.
· الحصول على بدلات التفتيش الميدانى.
العيوب
انك هاتشتغل شغل إداري إلي حد ما في هذه الهيئات وغالبا مش كل التخصصات هاتقدر تلتحق بيها

** الحجر الصحى :

المميزات

· إمكانية التسجيل المبكر للدراسات العليا (باطنة ،قلب،المناطق الحارة،عناية مركزة، صحة عامة)
· الاشتراك فى الدورات التدريبية المتخصصة.
· الحصول على 150%من أساسي المرتب كمكافأة شهرية من حصيلة التوكيلات الملاحية
العيوب
انك برده هاتشتغل شغل إداري وكمان ممكن تتحدف في أي مطار او أي علي مستوي الجمهورية

-2 الإدارة المركزية للمعامل مميزاتها :

* التدريب على أحدث الأجهزة المعملية.
* إمكانية التسجيل المبكر للدراسات العليا

-3 الإدارة المركزية لشئون البيئة.

-4 الإدارة المركزية للأمراضالمتوطنة

================================================

والان مع

كيف تختار التخصص المناسب لك ؟؟؟

الوصايا العشر لاختيار التخصص المناسب لك

أولا
صلاة الاستخارة

ثانيا
صبـــــــــــــــرا
ما تستعجلشي وتكتب تخصص من التخصصات الملحة بحجة انك مش عاوز تقعد في التكليف كتير وعاوز تختصر وقت وتبقي أخصائي بأسرع وقت ممكن لأنه اللي خلاك تصبر سبع سنين علشان تتخرج مش هاتصبر سنة ولا سنتين تاني وتاخد التخصص اللي بتحبه وعاوزه لأنه كل تخصص له تعبه وقرفه ولازم تكون حابب التخصص بتاعك علشان تقدر تستحمل تعبه وقرفه وعلشان تقدر تبدع فيه وتنجح فيه

ثالثا
حدد ميـــولك
هل ميولك باطنية ولا جراحية ؟؟
لو ميولك باطنية يبقي شوف ايه أكتر حاجة شغالة في السوق وبتحبها في نفس الوقت أو علي الأقل متقبلها واوعي تقؤل انه التخصص ده فيه دكاترة كتير وده فيه دكاترة قليلين لأنه مش كل الدكاترة ناجحين وممكن يظهر دكتور بتاع أطفال مثلا وسط ألف دكتور أطفال ويبقي أكتر واحد ناجح فيهم انت وشطارتك لأنه ببساطة كل التخصصات دلوقتي اتملت دكاترة ولو فيه لسه بعض التخصصات ما بقيش فيها دكاترة كتير مستقبلا هايكون فيها دكاترة كتير

لو ميولك جراحية وتقدر تشتغل تحت ضغط وقلق عادي يبقي خد النسا بلا منازع لو مش هاتقدر تشتغل تحت ضغط وقلق يبقي خد أي جراحة تانية زي العظام أو الأنف والأذن

رابعا
خد اللي يناسب ظروفك
يناسبك ظروفك الأسرية ( خصوصا للفيمال ) زي تخصص الجلدية – طب الأسرة وغيرها من التخصصات البسيطة

خامسا
تخصصات جامعة
فيه تخصصات كده بتاعة جامعة ومعدل نجاح طبيب الصحة فيها قليل لعدم وجود مكان يقدر الدكتور يتعلم فيه كويس في وزارة الصحة زي تخصص الرمد – المسالك – جراحة الصدر والقلب- جراحة المخ والأعصاب – التجميل – الأوعية الدموية
بس لو لقيت مكان كويس تقدر من خلاله تتعلم في التخصصات دي وحابب تخصص منهم يبقي اتكل علي الله وخده

سادسا
اجمع الداتا
اجمع كل المعلومات بتاعتك عن التخصص اللي ناوي عليه وشوف هل لو قدمت عليه مجموعك هايجيبه وهايجيلك فين وهل عندك استعداد تروح السلوم علشان التخصص ده ولا مش عاوز تبعد عن بيتكم ؟

سابعا
ماستر ولا دبلومة ؟


اسأل نفسك يا تري عاوز تحضر في التخصص ده ماستر ولا دبلومة لأنه ده هايفيدك في انك تختار التخصص علشان أوقات تخصصات معينة الماستر فيها بيكون صعب وبياخد وقت فا تتطر انك تغير التخصص

ثامنا

ازاي هاتتعلم ؟
اسأل نفسك ازاي هاتتعلم في التخصص ده وتبقي فيه دكتور كويس لأنه فيه أماكن ممكن تكون قريبة منك لكن التعليم فيها مش كويس وحط لنفسك خطة ازاي تقدر تتعلم في التخصص بتاعك عن طريق انك تعمل زاير مثلا الي أي جامعة ولا تعمل انتداب الي مستشفي فيها تعليم كويس

تاسعا
إيـــــــــــاك
ما تربطشي تخصصك بموضوع السفر خليه موضوع ثانوي لكن مش هو الأساس لأنك بسهولة ممكن تحصل معاك ظروف وما تقدرشي تسافر أو ممكن ما تلاقيش فرصة كويسة للسفر ولأنه السفر ده فترة مؤقتة مش هاتاخد عمرك كله في السفر فا لازم تاخد تخصص ينفع تشتغل فيه في مصر وبره مصر .

عاشرا
الأرزاق بيد الله
اجعل في قلبا إيمانا دائما انه الأرزاق بيد الله في أي تخصص بتختاره ورزقك هايجيلك لحد عندك بس المفروض علينا إننا نحسن الاختيار ونسأل ونستشير و نتكل علي الله

وأخيرا
وفقكم الله لما يحب ويرضي

=============================================

والآن مع قوانين وقواعد النيابات كما جاءت من الوزارة

بسم الله الرحمن الرحيم

” وقل اعملوا فسيرى الله عملكم ورسوله والمؤمنون “

صدق الله العظيم


أبناؤنا الأطباء والطبيبات
يسعدنا أن نهنئكم على اتمامكم مرحلة التكليف ، وانتم الآن على مشارف مرحلة جديدة من الممارسة العملية والميدانية فى التخصصات الطبية داخل المجتمع سواء فى قطاعات وزارة الصحة والسكان والهيئات التابعة لها 0
أبناؤنا الأطباء والطبيبات
لقد حاولنا فى هذا الدليل أن نضع بين ايديكم ماأمكن من المعلومات عن مرحلة مابعدالتكليف للأطباء والمستقبل الوظيفى للطبيب بعد قضاء فترة التكليف ، وكذلك الارشادات التى تعينكم على اختيار التخصصات الطبية التى ترغبونها وسوف يقوم مكتب التنسيق بالادارة العامة لشئون التكليف هذاالعام بتوزيع الأطباء والطبيبات على هذه التخصصات بنظام التنسيق العام طبقا للقواعد التالية(الاحتياجات- المجموع الإعتباري- الرغبات )وستكون المفاضلة بين ذوى الرغبة الواحدة مجموع الدرجات الاعتبارى0 علما بأن هذه الحركة تتم بالطريقه الالكترونيه ( الانترنت ) فقط.
لذلك ندعوكم إلى دراسة هذا الدليل ومايتضمنه من بيانات وارشادات
راجين لكم التوفيق والسداد

مع تحيات

الإدارة العامة لشئون التكليف

البـــــــــاب الأول

قرار وزير الصحة

رقم290لسنة2007

بشأن قواعد حركة الأطباء المقيمين

وتعديلاته

جمهورية مصر العربية

وزارة الصحة


الوزيــــــر بسم الله الرحمن الرحيم

قرار وزير الصحة و السكان

رقم ( 290 ) لسنة2007

بشأن قواعد حركة الأطباء المقيمين

ــــــــــــــــــــــــــــــــــــــــــــــــــ ــــــــ


وزير الصحة و السكان
بعد الإطلاع علي قانون نظام العاملين المدنيين بالدولة رقم 47 لسنة 978 0
وعلي قانون نظام الإدارة المحلية رقم 43 لسنة 979
و علي قرار رئيس الجمهورية رقم 242 لسنة 996 بتنظيم وزارة الصحة و السكان 0
وعلي القرار الوزاري رقم 62 لسنة 2004 بشأن نظام الأطباء المقيمين ومن في حكمهم 0
وبناء علي توصيات لجنة التكليف في إجتماعها المنعقد بتاريخ 20 / 6 / 2007

قــــــــــــرر
مادة ( 1 ) : يعمل بالقواعد المرافقة لهذا القرار في شأن قواعد حركة الأطباء المقيمين ( النواب)، ويلغي كل ما يخالفها من قرارات

مادة ( 2 ) : ينشر هذا القرار في الوقائع الرسمية و يعمل به من اليوم التالي لتاريخ نشره 0

تحريرا في : 4 / 7 / 2007

وزير الصحة و السكان
أ . د حاتم مصطفي الجبلى

جمهورية مصر العربية
وزارة الصحة والسكان
الوزيــــــر

قواعد حركة الأطباء المقيمين المرافقة

للقرار الوزاري رقم ( 290 ) لسنة 2007

ــــــــــــــــــــــــــــــــــــــــــــــ

مادة ( 1 ) : تعلن الإدارة العامة لشئون التكليف عن إحتياجات المديريات والهيئات من الأطباء المقيمين عددا و تخصصا قبل أول مارس وأول سبتمبر من كل عام 0
مادة ( 2 ) : تصدر حركة الأطباء المقــيمين الأســاســية في شــهر مايو من كل عام ويلحق بها حركة تكميلية في شهر نوفمبر من ذات العام 0
مادة ( 3 ) : يتم توزيع الأطباء المقيمين علي التخـصصات والجهات الطالبة من خلال حركة تنســـــيق عامة طـــبقا للمجــــموع ( الإعتباري ) ، والإحـتياجات ، والرغبات ويفتح باب التظلم من حركة التوزيع خلال خـمسة عشر يوما من إعلان النتيجة ، و يتم البت في التظلمات خـلال الخمسة عشر يوما التالية 0
مادة ( 4 ) : يتم إختيار الطبيب المقيم بالمستشفيات العامة والمركزية والنوعية ، و الهــــيئات التابعـة للوزارة من بين الأطباء الذين قضوا فـترة عمل فعلي في الجهات التي تم تكــليفهم بها من سنة إلي خمس سنوات، وذلك بالنسبة للتخصصات التي تحددها لجنة التكليف 0
مادة ( 5 ): يجوز للأطباء المكلفين التقدم للتخصصات الملحة من بداية التكليف،وتحددهذه التخصصات سنويا بمعرفة لجنة التكليف
مادة ( 6 ): يسمح للأطباء الذين تم إعادة توزيعهم علي الجهات خارج الوزارة بالتقدم لوظائف الأطباء المقيمين المعلن عنها من قبل الإدارة العامة لشئون التكليف
مادة ( 7 ) : تحدد مدة عمل الطبيب المقيم بأربع سنوات في فرع التخصص ، يرشح خلالها لدراســــة الدبلوم أو الماجستير أوالزمالة المصرية ،و يشترط أن تكون هذه المدة مدة عمل فعــلية ، ويجوز زيادتها في حالة عدم الحصول علي المؤهل وطبقا للإحتياج ، وذلك بعد موافــقــة كل من جهة العمل والإدارة المركزية للطب العلاجي، و بحد أقصي ثلاث سنوات يتم تأهيل الطبيب بعدها للعمل الإداري
مادة ( 8 ) : يجوزتعديل التخصص الذي رشح له الطبيب خلال ستةأشهرمن تاريخ إستلامه العمل ولمرةواحدةفقط بشرط سماح المجموع فىذات الحركةالتىرشح لهاالطبيب علىأن تحتسب فترة النيابة إعتبارا من تاريخ إستلام العمل بالتخصص الجديد
مادة ( 9 ) : يعود الطبيب المقيم إلي جهة عمله الأصلية إذا رغب في إلغاء النيابة ، أو لم يتسلم العمل في المحافظة التي رشح لها ( خلال ستة أشهر ) ، وفي هذه الحالة يحرم من التقدم للنيابات حركتين متتاليتين
مادة (10) : يجوزللطبيب طلب تغيير الجهة التي رشح لها بعد قضاء سنتين عمل فعلي من إستلامه العمل بها وبشرط موافقة الجهتين و الإدارة المركزية للطب العلاجي .
مادة (11) : يسمح للطبيب بالتسجيل لدراسة الدبلوم أو الماجستير أو الزمالة المصرية بعد قضاء ستةأشهر في التخصصات الملحة ، أو سنة عمل فعلي في التخصصات العادية 0
مادة (12) : في حالة ترشــــــيح الطبيب لدراسة الدبلوم أو الماجستير بإحدي كليات الطب يجـوزإنتدابه لمدة عام للمحافظة الكائن بها كلية الطب ، أو أقرب محافظة لها ، وعند إنتهاء
فترة الإنتداب يجب علي الطبيب أن يعود إلي مقر عمله الأصلي 0
مادة ( 13 ): يمنح الطـــبيب تفرغا للدراسة ( في الجزء الثاني ) طبقا لما تقتضيه ظروف الدراسةالتي يتم إقرارها من قبل الجامعة ولائحة البعثات المعمول بها 0
مادة ( 14 ) : في حالة إنتداب الطـــبيب المقيم لبرنامج الزمالة المصرية ، لايجوز مد فترة الإنتداب أكثر من الفترة المحــددة للتدريب للتخصص ( 3 ــ 5 ) ســـنوات يعود الطبيب بعدها
إلي جهة عــمله الأصلية كطبيب مقيم بذات التخصـص في القــطاع العلاجي بالمديرية المــنتدب منها علي أن يتقــدم لإمــتحان الزمالة طبقا للقواعد المنظـــمة لذلك ،فإذا لم يحصل الطبيب علي شهادة الزمالة المصرية يتم تأهيله للعمل الإداري بذات المحافظة 0
مادة ( 15 ): إذا حصل الطبيب علي الدبلوم أو الماجستير أوالزمالة المصرية قبل إنتهاء فترة نيابته وكان منتدبا إلي إحدي الهيئات التابعة للوزارة (المؤسسة العلاجية ، هيئة المستشفيات والمعاهد التعليمية ، المراكز الطبية المتخصصة ،التأمين الصحي )، يســــتمر في مكان إنتدابه حتي إنتهاء فترة النيابة0أما إذا لم يحصل الطبيب المنتدب إلي إحدي الجهات المشارإليها فإنه يعود إلي المديريةالمنتدب منها و يســـــتمر في عـمله كطبيب مقيم حتي حصوله علي المؤهل خــــلال مدة أقصاها ثلاث سنوات يتم بعدها تأهيل الطبيب للعمل الإداري إذا لم يحصل علي المؤهل
مادة ( 16 ) : يسـمح للأطباء المجندين بالتقدم لوظائف الأطباء المقيمين في التخصــصات المختلفة ووفقا للشـروط المقررة ، و ذلك في حالة قضـــــائهم بالتجنيد فترة مساوية لاقــرانهم بالتكليف وتحسب المدة التالية كمدة عمل بالنيابة إذا كانت في ذات التخصص المرشح له ،وقام الطبيب خلالها بممارسة مهام الطبيب المقيم في إحدي المســـتشـــفيات العســــكرية ، ولاتحتسب سنة التكليف بالمستشفيات العسكرية ضمن فترة النيابة ، فإذا إنتهــــــــت فترة تجـنيده يستكمل مدة عمله كطبيب مقيم بوحدات وزارة الصحة

قرار وزير الصحة والسكان

رقم(509)لسنة2008

فى شأن قواعد حركة الاطباء المقيمين

وزير الصحة والسكان:
بعد الاطلاع على قانون نظام العاملين المدنيين بالدولة رقم47لسنة1978 0
وعلى قانون نظام الادارة المحلية الصادر بالقانون رقم43لسنة1979 0
وعلى قرار رئيس الجمهورية رقم242لسنة1996بتنظيم وزارو الصحة والسكان0
وعلى القرار الوزارى رقم62لسنة2004بشأن نظام الأطباء المقيمين0
وعلى القرار الوزارى رقم 290لسنة2007بشأن نظام الاطباء المقيمين ومن فى حكمهم0
وبناء على ماعرضه مساعد الوزير لشئون العلاج الطبى0

قرر

(المادة الاولى)


يستبدل بنص المادتين5،2من قواعد حركة الأطباء المقيمين المرافقة للقرار الوزارى رقم290لسنة2007المشار اليه- النصين الآتيين:-
مادة(2):
يعلن عن حركة الأطباء المقيمين الأساسية فى شهر مايو من كل عام وتلحق بها حركة تكميلية فى شهر نوفمبرمن ذات العام0
مادة(5):
يجوز للأطباء المكلفين التقدم للتخصصات الملحة بعد قضاء ستة اشهر من استلام العمل.وذلك فى حدود نسبة25%من اجمالى الاحتياجات.ويتم التنفيذ بعد ستة اشهر من تاريخ الاعلان عن هذه التخصصات0

(المادة الثانية)


ينشر هذا القرار فى الوقائع المصرية ويعمل به من اليوم التالى لتاريخ نشره

قرار وزير الصحة والسكان

رقم(2)لسنة2009

فى شأن قواعد حركة الاطباء المقيمين

وزير الصحة والسكان:
بعد الاطلاع على قانون نظام العاملين المدنيين بالدولة رقم47لسنة1978 0
وعلى قانون نظام الادارة المحلية الصادر بالقانون رقم43لسنة1979 0
وعلى قرار رئيس الجمهورية رقم242لسنة1996بتنظيم وزارو الصحة والسكان0
وعلى القرار الوزارى رقم62لسنة2004بشأن نظام الأطباء المقيمين0
وعلى القرار الوزارى رقم 290لسنة2007بشأن نظام الاطباء المقيمين ومن فى حكمهم0
وبناء على ماعرضه مساعد الوزير لشئون العلاج الطبى0

قرر

(المادة الاولى)

يستبدل بنص المادة(2)من قواعد حركة الاطباء المقيمين المرافقة للقرار الوزارى رقم290لسنة2007المشار اليه والمعدل بالقرار الوزارى رقم509لسنة2008-النص الآتى:
مادة(2):
يعلن عن حركة الاطباء المقيمين الاساسية فى شهر نوفمبر ويلحق بها حركة تكميلية فى شهر مايو من العام التالى0

(المادة الثانية)

ينشر هذا القرار فى الوقائع المصرية ويعمل به من اليوم التالى لتاريخ نشره0ويلغى كل مايخالفه من قرارات0


About these ads